ជំនាញទាំង៧ ដែលអ្នកគួរមាននាសម័យបច្ចេកវិទ្យានេះ
- 2022-08-29 9:54:57
- ចំនួនមតិ 0 | ចំនួនទស្សនា 308
ជំនាញទាំង៧ ដែលអ្នកគួរមាននាសម័យបច្ចេកវិទ្យានេះ
ការត្រៀមខ្លួនជាមួយនឹងការពង្រឹងជំនាញរបស់ខ្លួន វាគឺជាការបង្កើននូវគុណភាពជីវិត។ មិនចំពោះថា អ្នកបានរៀននៅទីណា ពេលណា ពិន្ទុខ្ពស់ក្តីឬទាបក្តីនោះទេ ដរាបណាអ្នកអាចឆក់យកបាននូវជំនាញទាំង៧ខាងក្រោមនេះ នោះអ្នកនឹងក្លាយជាមនុស្សជោគជ័យលើការអភិវឌ្ឍខ្លួនជាក់ជាមិនខាន។ ហើយខាងក្រោមនេះជាជំនាញទាំង៧ដែលលោកអ្នកគួរឈ្វេងយល់៖
១) ច្នៃប្រឌិត និងបង្កើតថ្មី៖ ការបង្កើតថ្មីសំដៅលើគោលគំនិតប្រាជ្ញាស្មារតី និងការច្នៃប្រឌិតរបស់អ្នកដែលខុសប្លែកពីរបកគំហើញមុនៗ (មានប្រយោជន៍សម្រាប់មនុស្សជាតិ)។ ការច្នៃប្រឌិតនឹងធ្វើឱ្យអ្នកក្លាយជាមនុស្សដែលមានសក្ដានុពលម្នាក់ដែលអាចចូលរួមប្រកួតប្រជែងក្នុងកិច្ចការសង្គមបានយ៉ាងជោគជ័យ។ ហើយវាជារឿងមួយដែលមិនអាចទៅរួចសម្រាប់អ្នកដទៃ តែវាអាចទៅរួចសម្រាប់អ្នក ដរាបណាអ្នកមិនបោះបង់ការព្យាយាមមួយនេះ។
២) ជំនាញកំុព្យូទ័រ៖ កុំព្យូទ័រត្រូវបានគេទទួលស្គាល់ថា បានដើរតួនាទីយ៉ាងសំខាន់នៅយុគសម័យបច្ចេកវិទ្យានេះ។ សមត្ថភាពវិជ្ជាជីវៈរបស់អ្នកទោះបីជាមានទំនាក់ទំនងតិចក្តី ច្រើនក្តី មិនអាចគេចផុតពីជំនាញមួយនេះបានឡើយ។ MS-Office, PowerPoint ឬ Excel គឺជាជំនាញគ្រឹះមួយដែលត្រូវបានគេមើលឃើញជាទូទៅថា វាចាំបាច់សម្រាប់កិច្ចការប្រចាំថ្ងៃនៅគ្រប់ស្ថាប័ននានា ដូច្នេះវាគឺជាជំនាញមួយដែលអ្នកមិនអាចខ្វះបានឡើយ។
៣) សមត្ថភាពដោះស្រាយបញ្ហា៖ វាគឺជាជំនាញមួយ យ៉ាងពិសេសដែលអាចបង្កើតភាពអស្ចារ្យនៅក្នុងបរិបទការងារ និងជីវភាពរបស់អ្នកបាន ទោះបីជាបញ្ហាទាំងនោះធំឬតូចក៏ដោយ។ ហើយការផ្ដោតលើមូលហេតុ និងឬសគល់នៃបញ្ហាវាជាវីធីសាស្ត្រមួយដែលធ្វើឱ្យអ្នកស្គាល់ច្បាស់ពីបញ្ហា និងដំណោះស្រាយ។ ហើយទាំងនេះ វាទាមទារឱ្យអ្នកមានទំនុកចិត្ត ក្លាហាន ហ៊ានប្រឈមមុខនឹងឧបសគ្គ និងមានសុទិដ្ឋិនិយមខ្ពស់ ធ្វើយ៉ាងណាប្រែក្លាយរឿងធំឱ្យទៅជារឿងតូច និងរឿងតូចឱ្យទៅជាអត់រឿង។
៤) ការសម្រេចចិត្ត៖ មនុស្សដែលមានសមត្ថភាពក្នុងការសម្រេចចិត្តដ៏ត្រឹមត្រូវ ទោះបីជាស្ថិតនៅក្នុងកាលៈទេសៈបែបណាក៏ដោយ ពួកគេនឹងមិនសាងប្រវត្តិសាស្ត្រឈឺចាប់ និងនិយាយពាក្យថាស្តាយក្រោយសម្រាប់ខ្លួនឯង ឬអ្នកដទៃឡើយ។ អ្នកអាចឈ្វេងយល់ពីស្ថានភាពនោះឱ្យច្បាស់ជាមុនសិនមុននឹងធ្វើការសម្រេចចិត្តដោយភាពជឿជាក់ ព្រមទាំងព្យាយាមធ្វើវាឱ្យសាមញ្ញ និងងាយស្រួលតាមអ្វីដែលអ្នកអាចធ្វើបាន។
៥) វិភាគវែកញែក៖ ជីវិតពិតជាពោរពេញទៅដោយឧបសគ្គ និងបញ្ហាជាច្រើនដែលកើតមានជាបន្តបន្ទាប់ នេះវាទាមទារឱ្យអ្នកមានជំនាញយ៉ាងពិសេសមួយទៀតដើម្បីជីកឫសគល់បញ្ហាទាំងអស់នោះ ហើយនោះវាគឺជាជំនាញវិភាគវែកញែក។ ដំណោះស្រាយជាច្រកផ្លូវឬអំណះអំណាងដ៏ត្រឹមត្រូវរបស់អ្នកដែលកើតចេញពីការវិភាគបញ្ហាទាំងនោះ ហើយវានឹងពាំនាំមកនូវទំនុកចិត្ត និងភាពជឿជាក់ដែលអាចបង្កើនសមត្ថភាពវិជ្ជាជីវៈរបស់អ្នកឱ្យដើរដោយរលូតឆ្ពោះទៅមុខជានិច្ច។
៦) ការគ្រប់គ្រងពេលវេលា៖ ការគ្រប់គ្រងពេលវេលាឱ្យមានប្រសិទ្ធភាពជាមួយនឹងការប្ដេជ្ញាចិត្តខ្ពស់ វាគឺជាផ្នែកមួយយ៉ាងសំខាន់ និងមានឥទ្ធិពលគ្រប់ស្ថានភាពទាំងអស់នៅក្នុងជីវិត។ វាហាក់បីដូចជា រឿងងាយស្រួលដើម្បីបំប៉នខ្លួនអ្នកឱ្យមានជំនាញមួយនេះ ប៉ុន្តែវាមិនដូចជាអ្វីដែលអ្នកគិតនោះទេ។ វិធីសាស្ត្រដ៏ល្អដើម្បីអនុវត្តន៍ចំណុចនេះបាន គឺអ្នកត្រូវតែរៀបចំគម្រោងបែងចែកកិច្ចការរបស់អ្នកឱ្យបានត្រឹមត្រូវ និងច្បាស់លាស់ជាមុនសិន។
៧) សមត្ថភាពទំនាក់ទំនង៖ ការទំនាក់ទំនង គឺជាជំនាញពិសេសមួយទៀតដែលអ្នកត្រូវមាន ហើយការងារដែលមានប្រសិទ្ធភាព ពិតជាមិនអាចកើតមាននោះឡើយ ប្រសិនបើអ្នកគ្មានជំនាញមួយនេះនៅក្នុងខ្លួន។ ការប្រាស្រ័យទាក់ទងតាមរយៈការសរសេរ ស្តាប់ និងការសន្ទនាយ៉ាងយកចិត្តទុកដាក់ជាមួយមនុស្សជុំវិញខ្លួននឹងជំរុញឱ្យជំនាញទំនាក់ទំនងរបស់អ្នករឹតតែមានសក្ដានុពលកាន់តែខ្លាំង៕
អត្តបទ៖ វិសាល
ផ្នែកមួយនៃសៀវភៅ៖ ផ្តើមពីសូន្យ
បញ្ជាក់៖ រាល់ការ Copy យកអត្ថបទពី Business Record ទាំងអស់ សូមបងប្អូនត្រូវដាក់ប្រភពឱ្យផង។ អរគុណ ដែលបានសហការ
សូមជួយចែករំលែកអត្ថបទនេះ ដើម្បីចំនេះដឹង :
អានអត្ថបទ:
© រក្សាសិទ្ធិគ្រប់យ៉ាងដោយ Business Record ឆ្នាំ ©2022
Business Recordនឺងនាំអាជីវកម្មរបស់លោកអ្នកទៅដល់ចំណុចកំពូលនៃភាពជោគជ័យ
Business Record មានចក្ខុវិស័យមួយដើម្បីជួយដល់ប្រជាជនកម្ពុជាឱ្យ យល់ដឹងបន្ថែមអំពីការធ្វើអាជីវកម្ម។ យើងផ្តល់ឱ្យពួកគេនូវដំណោះស្រាយ ទាំងឡាយណាដែលជួយ ឱ្យអាជីវកម្មរបស់ពួកគេមានកេរ្តិ៏ឈ្មោះ និងជាប្រភពនៃការលើកទឹកចិត្ត ដល់ប្រជាជនកម្ពុជាក្នុងការចាប់ផ្តើម ធ្វើអាជីវកម្មរបស់ពួកគេដែលប្រកបទៅដោយប្រសិទ្ធភាព។