Business Record

៤ចំណុចដ៏មានឥទ្ធពលដើម្បីកែប្រែជីវិតរបស់អ្នក

2022-08-09 3:23:51
ចំនួនមតិ 0 | ចំនួនទស្សនា 342

ក្នុងនាមជាមនុស្សម្នាក់ដែលមានសក្តនុពល អ្នកត្រូវផ្តោតឱ្យខ្លាំងទៅលើរឿងទម្លាប់របស់ខ្លួន ព្រោះថាវាគឺជារឿងមួយដ៏សំខាន់បំផុតក្នុងការរៀបចំខ្លួនដើម្បីទទួលយកបញ្ហាជាច្រើនមកដោះស្រាយ។ ដូចនេះក្រុមការងារ Business Record សុំលើកយក ៤ចំណុចខាងក្រោមនេះ ដើម្បីអាចជាពន្លឺមួយជួយត្រួសត្រាយផ្លូវឱ្យបងប្អូនយកទម្លាប់នេះទៅអនុវត្ត៖

១. ទទួលយកការបរាជ័យ៖ ក្នុងនាមជាមនុស្សដែលមានសក្កនុពលម្នាក់ អ្នកមិនត្រូវគេចវេសឬបោះបង់ចោល និង ចុះចាញ់ឧបសគ្គនៅចំពោះមុខឡើយ។ អ្នកត្រូវតែជាមនុស្សរឹងមាំហ៊ានប្រឈមមុខនឹងភាពបរាជ័យ ហើយចាប់ផ្តើមងើបដើរម្តងទៀតដោយភាពក្លៀវក្លា។ ដ្បិតអីភាពបរាជ័យ វានឹងបង្រៀនអ្នកឱ្យចេះសិក្សាឈ្វេងយល់ពីបញ្ហាដែលបានកើតឡើង ក៏ដូចជាធ្វើឱ្យអ្នកទទួលបាននូវបទពិសោធន៍កាន់តែច្រើនជាងមុនដើម្បីជាតម្រុយសម្រាប់អ្នកដើរទៅមុខបន្តជៀសវាងដើរលើដានផ្លូវចាស់។

២. ប្រឈមមុខនឹងភាពភ័យខ្លាច៖ ភាពភ័យខ្លាចមាន៣យ៉ាងគឺ ភ័យខ្លាចទី១: កើតមានឡើងនៅពេលដែលអ្នកភ័យខ្លាចបាត់បង់វត្ថុ ឬរបស់មានតម្លៃណាមួយ។ ភ័យខ្លាចទី២: នេះជាដំណាក់កាលមួយដែលភាពភ័យខ្លាចបានក្លាយជាស្រមោលអន្ទោលតាមប្រាណនៅរាល់ពេលដែលអ្នកព្យាយាមធ្វើកិច្ចការថ្មីៗដោយមិនទាន់ដឹងលទ្ធផល។ ភ័យខ្លាចទី៣: កើតមានឡើងនៅពេលដែលអ្នកមិនព្រមទទួលយកលទ្ធផល ឬការពិតដែលខ្លួនបានសម្រេចចិត្ត។ ការមិនទទួលស្គាល់លទ្ធផលនេះមិនខុសអីពីការមិនដឹងថាខ្លួនកំពុងឈរនៅកន្លែងណានោះឡើយ។ បែបនេះហើយទើបការហ៊ានប្រឈមមុខនឹងភាពភ័យខ្លាច វាគឺជារឿងដ៏សំខាន់ ដែលអ្នកគួរយកចិត្តទុកដាក់ដើម្បីពង្រឹងស្មារតីរបស់អ្នកឱ្យរឹតតែរឹងមាំ។

៣. ដាក់វិន័យលើខ្លួនឯង៖ មានមនុស្សជាច្រើនតែងតែចង់ឃើញអនាគតរបស់ខ្លួនមានលទ្ធផលល្អ និងទទួលបាននូវអ្វីដែលខ្លួនប្រាថ្នាចង់បាន។ ប៉ុន្តែអ្វីដែលជាគ្រោះថ្នាក់ដ៏ធំនោះគឺ ពួកគេចង់បាន តែមិនចង់ធ្វើ ហើយក៏រំពឹងលទ្ធផលល្អ តើវាអាចទៅរួចដែរទេ?……ការដែរមិនបានធ្វើអ្វីមួយឱ្យល្អចេញជាដុំកំភួនសម្រាប់ថ្ងៃនេះ នោះថ្ងៃស្អែកអ្នកក៏នឹងមិនអាចទទួលបានលទ្ធផលជាដុំកំភួនអ្វីនោះដែរ។ ដូច្នេះកុំស្រមៃថាអនាគតរបស់អ្នករុងរឿងដូចអ្វីដែលអ្នកបានគិត ទាំងដែរអ្នកមិនបានធ្វើអ្វីទាំងអស់នោះ។ ចូរអ្នកដាក់វិន័យលើខ្លួនឯងទៅលើកិច្ចការអ្វីមួយដែលអ្នកចង់បាន នោះអ្នកនឹងទទួលបាននូវអ្វីដែលអ្នកចង់បាននោះហើយ។

៤. គេងឱ្យបានគ្រប់គ្រាន៖ បើទោះបីជាត្រូវចំណាយពេលច្រើនប៉ុណ្ណាដើម្បីធ្វើកិច្ចការងាររបស់អ្នកក៏ដោយ ចូរកុំភ្លេចរឿងសម្រាកឱ្យសោះ កុំខំរហូតដល់ភ្លេចបាយភ្លេចទឹក។ តែត្រូវចេះរៀបចំបែងចែកពេលវេលាឱ្យបានច្បាស់លាស់ដើម្បីលៃលកពេលវេលាចូលគេងឱ្យបានគ្រប់គ្រាន់ និងបរិភោពឱ្យបានត្រឹមត្រូវទាងទាត់។ ការគេងបានគ្រប់គ្រាន់វានឹងធ្វើឱ្យខួរក្បាលរបស់អ្នកដំណើរការបានល្អ មិនភ្លេចមុខភ្លេចក្រោយ ជាពិសេសការដែរគេងបានគ្រប់គ្រានវានឹងផ្តល់ថាមពលឱ្យអ្នកបានយ៉ាងពេញទំហឹងដើម្បីបំពេញកិច្ចការប្រចាំថ្ងៃរបស់អ្នកឱ្យដើរដោយរលូនទៅមុខបានល្អ។

អត្ថបទ៖ ប៊ុនហ៊ាង

——————————————–

Channel Telegram: https://t.me/businessrecord2022

ព័ត៌មានអំពីសៀវភៅ៖ https://bit.ly/3bj3sOX

តំណាងចែកចាយ៖ https://bit.ly/3cqLBJ5

——————————————–

បញ្ជាក់៖ រាល់ការ Copy យកអត្ថបទពី Business Record ទាំងអស់ សូមបងប្អូនត្រូវដាក់ប្រភពឱ្យផង។ អរគុណ ដែលបានសហការ

សូមជួយចែករំលែកអត្ថបទនេះ ដើម្បីចំនេះដឹង :

អានអត្ថបទ: