សញ្ញាដែលបង្ហាញថាអ្នកមិនអាចរួចផុតពីភាពក្រីក្រ
- 2022-08-06 6:03:04
- ចំនួនមតិ 0 | ចំនួនទស្សនា 657
សញ្ញាដែលបង្ហាញថាអ្នកមិនអាចរួចផុតពីភាពក្រីក្រ
គ្មាននរណាម្នាក់ចង់ក្លាយជាអ្នកក្រនោះទេ តែយ៉ាងណាក៏ដោយ បើទោះបីជាមនុស្សស្អប់ភាពក្រីក្រ ហើយចង់បានភាពមានបានក៏ដោយក៏ស្ថានភាពជាក់ស្តែង អ្នកមានទ្រព្យសម្បត្តិច្រើនគឺនៅតែស្ថិតក្នុងភាគរយតិចតួចដដែល ខណៈដែរចំនួនអ្នកក្រវិញគឺមានច្រើនលើសលប់នៅលើពិភពលោក។ ហើយខាងក្រោមនេះគឺជាសញ្ញាមិនល្អមួយចំនួនដែលរារាំងមនុស្សមិនឱ្យក្លាយទៅជាអ្នកមាននៅពេលអនាគត៖
ចាយច្រើន៖ បច្ចុប្បន្នមនុស្សភាគច្រើនតែងនិយមប្រើប្រាស់សំភារៈទំនើបៗដែលមានតម្លៃថ្លៃៗដោយមិនសូវខ្វល់ពីរបៀបបែងចែកប្រាក់ចំណូលឡើយ ព្រោះអ្វីដែលសំខាន់សម្រាប់ពួកគេគឺសន្សំលុយទិញសំភារៈទំនើបៗទាំងនោះ។ សម្រាប់អ្នកដែលមានលទ្ធភាពគ្រប់គ្រាន់ គឺវាគ្មានបញ្ហាអ្វីនោះទេ ប៉ុន្តែបញ្ហាគឺត្រង់ថាអ្នកដែលមិនសូវមានលទ្ធភាព ព្រោះពួកគេភាគច្រើនព្យាយាមប្រើប្រាស់របស់ទាំងនោះ បើទោះជាខ្លួនមិនមានលទ្ធភាពគ្រប់គ្រាន់ក៏ដោយ។ ប្រការនេះហើយដែលធ្វើឱ្យមនុស្សភាគច្រើនមិនអាចមានប្រាក់គ្រប់គ្រាន់សម្រាប់ប្រើប្រាស់នាថ្ងៃអនាគតបាន ព្រោះពួកគេមិនបានសន្សំប្រាក់សម្រាប់ពេលចាំបាច់។
មានបំណុលច្រើនពេក៖ ការជំពាក់ធនាគារឬនរណាម្នាក់ វាគឺជារឿងជៀសមិនផុតនោះទេ ទាំងក្នុងជីវិតឯកជនធម្មតា និងក្នុងពេលធ្វើអាជីវកម្ម។ តែអ្វីដែលជាបញ្ហានោះ នៅត្រង់ថា ការខ្ចីលុយនោះគឺធ្វើឡើងក្នុងន័យអ្វី ហើយមានផែនការច្បាស់លាស់ក្នុងការសង់វិញដែរឬអត់។ អ្នកខ្លះខ្ចីលុយគេដើម្បីពង្រឹងជំនួញរបស់ខ្លួនឱ្យកាន់តែរឹងមាំ ប៉ុន្តែអ្នកខ្លះទៀតជំពាក់ធនាគារដោយសារសំញែងសំភារៈនិយមឬលេងល្បែងស៊ីសងផ្សេងៗ។
ពឹងផ្អែកលើអ្នកដទៃខ្លាំងពេក៖ ការពឹងពាក់អ្នកដទៃ គឺជារឿងធម្មតាសម្រាប់ជីវិតប្រចាំថ្ងៃរបស់មនុស្សគ្រប់រូប ព្រោះមនុស្សម្នាក់មិនអាចធ្វើអ្វីៗគ្រប់បែបយ៉ាងបានទាំងអស់នោះទេ ដូច្នេះហើយទើបត្រូវការជួយគ្នាទៅវិញទៅមក។ ប៉ុន្តែមិនមែនមានន័យថា រាល់ពេលដែលអ្នកពឹងអ្នកដទៃគឺជារឿងត្រឹមត្រូវរហូតនោះទេ ព្រោះវាអាចទៅជាទម្លាប់មិនល្អមួយក្នុងការមិនហ៊ានឬមិនព្រមព្យាយាមបញ្ចេញសមត្ថភាពឱ្យអស់ដោយខ្លួនឯង ហើយបែរជាទៅពឹងតែអ្នកដទៃឱ្យជួយជាប្រចាំ។ នៅពេលដែលអ្នកមិនធ្វើរឿងអ្វីមួយឱ្យអស់ពីសមត្ថភាពឬពីលទ្ធភាពទេនោះ អ្នកនឹងមិនអាចឈោងចាប់យកភាពជោគជ័យឬរំដោះខ្លួនចេញពីភាពក្រីក្របានឡើយ ជាពិសេសនៅថ្ងៃមួយដែលគ្មានមនុស្សជួយអ្នកតែម្តង។ ដូច្នេះគួរធ្វើកិច្ចការឱ្យអស់ពីកម្លាំងកាយចិត្តជាមុនសិន មុនអ្នកសម្រេចថាពឹងអ្នកដទៃឱ្យជួយ។
គ្មានមហិច្ឆតា៖ មហិច្ឆតាគឺជាចំណុចដ៏សំខាន់របស់មនុស្សក្នុងការសម្រេចអ្វីមួយ តែបើគ្មានមហិច្ឆតាទេ មនុស្សភាគច្រើនមិនសូវគិតចង់ធ្វើអ្វីឡើយ ហើយបើទោះបីជាធ្វើក៏ធ្វើដោយមិនអស់ពីលទ្ធភាព និងសមត្ថភាពដែរ។ ជាក់ស្តែងបើកាលណាមនុស្សណាម្នាក់មានមហិច្ឆតាចង់ក្លាយទៅជាអ្វីមួយហើយ គេនឹងស្វែងរកវិធីគ្រប់បែបយ៉ាងដើម្បីសម្រេចគោលដៅរបស់ខ្លួនឱ្យទាល់តែបាន បើទោះបីជាមានការលំបាក និងត្រូវចំណាយពេលវេលាយូរយ៉ាងណាក៏ដោយ។
ជំហរមិនច្បាស់លាស់៖ បើអ្នកមិនមានជំហរច្បាស់លាស់ក្នុងការធ្វើកិច្ចការអ្វីមួយនោះទេ នោះអ្នកនឹងធ្វើការងារដោយគ្មានគោលដៅ គឺចេះតែធ្វើដើម្បីកំដរតែពេលវេលា។ នៅពេលដែលអ្នកគ្មានគោលជំហរច្បាស់លាស់ វាប្រាកដណាស់ថាអ្នកនឹងមិនអាចមានឥទ្ធិពលលើអ្នកដទៃបានឡើយ តែគឺជាអ្នកទៅវិញទេដែលទទួលរងឥទ្ធិពលពីអ្នកដទៃនោះ។ ក្នុងន័យនេះមិនមែនឱ្យអ្នកត្រូវតែឈរលើគោលជំហររបស់ខ្លួនរហូតខ្វះការពិចារណាឬស្តាប់យោបល់ពីអ្នកដទៃនោះទេ គឺអ្នកត្រូវស្តាប់ និងពិចារណាដោយយកចិត្តទុកដាក់ ហើយយកវាមកថ្លឹងថ្លែងឱ្យឃើញថា តើវាពិតជាត្រឹមត្រូវ និងមានឱកាសជោគជ័យឬក៏អត់៕
អត្ថបទ៖ វិសាល
បញ្ជាក់៖ រាល់ការ Copy យកអត្ថបទពី Business Record ទាំងអស់ សូមបងប្អូនត្រូវដាក់ប្រភពឱ្យផង។ អរគុណ ដែលបានសហការ
សូមជួយចែករំលែកអត្ថបទនេះ ដើម្បីចំនេះដឹង :
អានអត្ថបទ:
© រក្សាសិទ្ធិគ្រប់យ៉ាងដោយ Business Record ឆ្នាំ ©2022
Business Recordនឺងនាំអាជីវកម្មរបស់លោកអ្នកទៅដល់ចំណុចកំពូលនៃភាពជោគជ័យ
Business Record មានចក្ខុវិស័យមួយដើម្បីជួយដល់ប្រជាជនកម្ពុជាឱ្យ យល់ដឹងបន្ថែមអំពីការធ្វើអាជីវកម្ម។ យើងផ្តល់ឱ្យពួកគេនូវដំណោះស្រាយ ទាំងឡាយណាដែលជួយ ឱ្យអាជីវកម្មរបស់ពួកគេមានកេរ្តិ៏ឈ្មោះ និងជាប្រភពនៃការលើកទឹកចិត្ត ដល់ប្រជាជនកម្ពុជាក្នុងការចាប់ផ្តើម ធ្វើអាជីវកម្មរបស់ពួកគេដែលប្រកបទៅដោយប្រសិទ្ធភាព។