Business Record

គំនិតគួរពិចារណា៖ វិធីសាស្ត្រខ្លះៗសម្រាប់អ្នកចង់ចាប់ផ្តើមរកស៊ី

2022-08-05 3:53:10
ចំនួនមតិ 0 | ចំនួនទស្សនា 497

ការបើកដំណើរការអាជីវកម្មដំបូងៗ វាគឺជារឿងមួយដ៏លំបាកសម្រាប់អ្នកដែលទើបនឹងប្រឡូកខ្លួនចូលថ្មីថ្មោង ព្រោះអ្វីៗសុទ្ធតែចាប់ផ្តើមពីចំណុចសូន្យទាំងអស់។ ប្រសិនបើមានបទពិសោធន៍ ដើមទុន និងធនធានមនុស្សគ្រប់គ្រាន់ នោះគឺជារឿងដ៏ល្អ ប៉ុន្តែបើអ្នកមិនដឹងថាត្រូវចាប់ផ្តើមពីចំណុចណា និងត្រូវមានអ្វីខ្លះទេនោះ វាមានន័យថា អ្នកចាំបាច់ត្រូវតែសិក្សាបន្ថែមមុននឹងបោះជំហ៊ានចូលប្រឡូកក្នុងវិស័យមួយនេះ។ ខាងក្រោមនេះ Business Record បានលើកយក៤ចំណុចមកបកស្រាយសង្ខេប គ្រាន់ជាគំនិតមុនឈានជើងដល់ការធ្វើអាជីវកម្ម៖

១. មានមហិច្ឆតាលើការចាប់ផ្តើម៖ ជាទូទៅអ្នកជំនួញឬមហាសេដ្ឋីនៅជុំវិញពិភពលោក ពួកគាត់តែងតែមានមហិច្ឆតារៀងៗខ្លួនដើម្បីបង្កើតអាជីវកម្មរបស់ខ្លួនឱ្យជោគជ័យ។ បើគ្មានមហិច្ឆតាទេ ម្ល៉េះអាជីវកម្មរបស់ពួកគាត់ទាំងនោះនឹងគ្មានផ្លូវបានឃើញពន្លឺថ្ងៃឡើយ។ ដូច្នេះវាសំខាន់ណាស់សម្រាប់អ្នកចង់ចេញរកស៊ីថ្មីថ្មោងដើម្បីស្គាល់ខ្លួនឯងឱ្យកាន់តែច្បាស់ថាពិតជាដាក់ចិត្តដាក់កាយលើកការបើកអាជីវកម្មថ្មីមួយនេះឱ្យបានសម្រេចពិតមែន។

២. សក្ដានុពលនៅលើទីផ្សារ៖ ចំណុចនេះនឹងអាចរកឃើញចម្លើយនៅពេលដែលអ្នកបានសម្លឹងមើល និងបានសិក្សាស្រាវជ្រាវទីផ្សារបានកាន់តែច្រើនពីកម្រិតនៃការទាក់ទាញ និងការទទួលបានការគាំទ្រពីសាធារណជន។ បើអ្នកមិនដឹងថាទីផ្សារត្រូវការអ្វី និងមានស្ថានភាពបែបណាទេ? តើអ្នកបង្កើតអាជីវកម្មមួយនេះឡើងដើម្បីអ្វី? ហើយគន្លឹះដ៏ល្អនៅទីនេះ គឺមានការស្រាវជ្រាវទីផ្សារបានត្រឹមត្រូវ និងច្បាស់លាស់ ទើបធ្វើឱ្យអ្នករកឃើញគំនិតចាប់ផ្តើមអាជីវកម្មពិតប្រាកដមួយសម្រាប់ខ្លួនឯងបានជោគជ័យ។

៣. មើលកញ្ចប់ហិរញ្ញវត្ថុ៖ ដោយហេតុថាអាជីវកម្មបើកដំបូងនឹងមិនអាចរកប្រាក់ចំណូលមកវិញបានភា្លមៗនោះ ដូច្នេះអ្នកត្រូវកំណត់ពីដើមទុនរបស់ខ្លួនក្នុងការបើកអាជីវកម្ម និងរៀបចំគម្រោងឱ្យច្បាស់ពីការចំណាយដោយប្រយោលផ្សេងៗ។ ហើយអ្វីដែលសំខាន់ជាងគេទៅទៀតនោះ គឺអាជីវកម្មថ្មីថ្មោងត្រូវមានទុនបម្រុងផ្សេងទៀតដែលត្រូវត្រៀមទុកជាមុន យ៉ាងហោចណាស់ទប់ឱ្យបានរយៈពេល១ឆ្នាំ ដើម្បីជៀសវាងស្ថានភាពប្រែប្រួលណាមួយដែលមិនអាចដឹងមុនមកបំផ្លាញអាជីវកម្មរបស់អ្នក។ ក្រៅពីនេះអ្នកត្រូវកំណត់រយៈពេលឱ្យច្បាស់លាស់មួយផងដែរ ថាតើអ្នកនឹងទទួលបានប្រាក់ចំណេញមកវិញនៅពេលណា? ហើយប្រាក់ចំណេញទាំងនោះមានប្រភពចេញមកពីណាខ្លះ?

៤. ចំណេះដឹងផ្នែកអាជីវកម្ម៖ គ្មាននរណាម្នាក់ល្អឥតខ្ចោះចេះគ្រប់ដប់ និងដឹងគ្រប់រឿងនោះទេ។ អ្នកក៏ដូចគ្នាដែរ ចន្លោះខ្វះខាតនៅក្នុងអាជីវកម្មគឺពិតជាមាន ដូច្នេះហើយបានជានៅពេលចាប់ផ្តើមថ្មីថ្មោង អ្នកត្រូវកំណត់ថា តើអ្វីទៅជាភាពខ្លាំង និងភាពខ្សោយរបស់ខ្លួននៅក្នុងការបើកអាជីវកម្ម? វិធីសាស្ត្រដ៏ល្អអ្នកត្រូវកំណត់ពីទេពកោសល្យ ឬជំនាញពិសេសរបស់អ្នកដែលត្រូវមានសម្រាប់ការធ្វើអាជីវកម្មឬត្រូវឈ្វេងយល់ថា ជំនាញធ្វើអាជីវកម្មរបស់អ្នកមានក្នុងកម្រិតប៉ុណ្ណា ទើបអាចឱ្យអាជីវកម្មមានដំណើការល្អ និងបន្តឈជើងបានយូរអង្វែង។

អត្ថបទ៖ ប៊ុនហ៊ាង

——————————————–

Channel Telegram: https://t.me/businessrecord2022

ព័ត៌មានអំពីសៀវភៅ៖ https://bit.ly/3bj3sOX

តំណាងចែកចាយ៖ https://bit.ly/3cqLBJ5

——————————————–

បញ្ជាក់៖ រាល់ការ Copy យកអត្ថបទពី Business Record ទាំងអស់ សូមបងប្អូនត្រូវដាក់ប្រភពឱ្យផង។ អរគុណ ដែលបានសហការ

សូមជួយចែករំលែកអត្ថបទនេះ ដើម្បីចំនេះដឹង :

អានអត្ថបទ: