ការរកស៊ីគឺត្រូវតែមានក្រមសីលធម៌ ហើយក្រមសីលធម៌នេះ វាតែងតែ​ប្រែប្រួលជានិច្ចពី​មនុស្ស​ម្នាក់​ទៅ​មនុស្ស​ម្នាក់ទៀត​ដោយ​ផ្អែកលើវប្ប​ធ​ម៍ ជាតិ​សាស្ត្រ និង​កត្តា​ផ្សេងៗទៀត។ បើកាលណាបុគ្គលិករបស់អ្នកខ្វះខាតនូវក្រម​សី​លធ​ម៌ វាក៏នឹងធ្វើឱ្យកេរ្តិ៏ឈ្មោះក្រុមហ៊ុនរបស់​អ្នក​មានបញ្ហាទៅតាមហ្នឹងដែរ។ ដូចនេះអ្នកអាចបង្វឹកក្រុមការងាររបស់អ្នកទៅលើ៥ចំណុច​ដូចខាងក្រោមនេះ៖

១-ត្រូវមាន​ភាពស្មោះត្រង់៖ ក្នុងការប្រកបអាជីវកម្ម អ្នកត្រូវផ្តោតសំខាន់បំផុតទៅ​លើភាពស្មោះត្រង់របស់បុគ្គលិក ដែលមានចំពោះក្រុមហ៊ុន និងអតិថិជន។ ព្រោះថាបញ្ហានេះវាជាកេរ្តិ៏ឈ្មោះរបស់ក្រុមហ៊ុនរបស់អ្នក ដែលជាអ្នកកំណត់ជោគវាសនាធ្វើឱ្យក្រុមហ៊ុនរបស់អ្នកអាចដំណើរការទៅមុខទៀតបានឬមិនបាន។ អ្នក​ប្រាកដជាយល់ហើយថា និរន្តរភាព​នៃអាជីវកម្មវានឹងមិនអាច​ស្ថិតនៅក្នុង​ដៃ​របស់អ្នកបាននោះទេ បើសិនជាអ្នកមិនផ្តោតសំខាន់ទៅលើរឿងក្រមសីលធម៌នេះ​។ ហើយទីផ្សារដែល​មិន​ប្រកបដោយ​ក្រមសីលធម៌​ វានឹងបង្ករ​គ្រោះថ្នាក់ដល់អ្នក​វិញ​បាននាពេលអនាគតជាក់ជាមិនខាន។

២- ភាព​ឯកជន​របស់​អតិថិជន​គឺជា​អាទិភាព៖ នេះ​គឺជា​រឿងមួយដ៏សំខាន់ដើម្បីទទួលបានទំនុកចិត្តពីអតិថិជន។ ព្រោះថាមនុស្សម្នាក់ៗ មិនថា​ជាបុគ្គលបែបណានោះទេ គេសុទ្ធតែមានកិត្តិយសរបស់គេរៀងៗខ្លួន។ ដូចនេះក្នុងនាមជាក្រុមហ៊ុនដែលផ្តល់នូវសេវាកម្មឬផលិតផលដល់អតិថិជន អ្នកត្រូវចេះទុករឿងនេះជារឿងសំខាន់ កុំឱ្យឯកជនភាពរបស់អតិថិជនរបស់អ្នកបែកធ្លាយឱ្យសោះ។ ហាមដាច់ខាតទៅនិយាយប្រាប់គេឯងជាសាធារណៈ បើទោះជាអ្នកស្គាល់គ្នាក៏ដោយ។ ដូចនេះសូម​យល់​អារម្មណ៍​​អតិថិជន ​និង​រក្សា​ការសម្ងាត់​របស់​ពួកគាត់​ផង និងកុំ​បកអាក្រាត​ការសម្ងាត់​របស់​អតិថិជន​របស់​អ្នក ព្រោះវាជារឿងថោកទាបណាស់។

៣- កុំ​បំផ្លើស៖ ចូរ​ធ្វើ​បទ​បង្ហាញ​ពី​ផលិតផល​របស់​អ្នក​ដូច​អ្វី​ដែលជាគុណភាពពិតប្រាកដនៃផលិតផលនោះ​។ កុំ​បំផ្លើស​ពីគុណភាពពិតរបស់វាអី ដែលវា​ហួសទៅនឹងលទ្ធភាពនៃផលិតផលឬ​សេវាកម្ម​របស់​អ្នក​ ដែលវាមិនមែនជាការពិត។ ក្នុងការទទួលប្រាក់ចំណេញ​គឺជា​អាទិភាព​មួយដើម្បីធ្វើឱ្យក្រុមហ៊ុនមានដំណើរការទៅមុនបាន ប៉ុន្តែអ្នកក៏ត្រូវមើលដែរអំពីគុណភាពពិតប្រាដកនៃផលិតផលឬសេវាកម្មនោះ ថាតើវាសមគ្នាឬក៏អត់។ កុំឱ្យថោកពេករហូតដល់អតិថិជនមើលងាយផលិតផលឬសេវាកម្មរបស់អ្នក ហើយក៏កុំឱ្យថ្លៃពេករហូត ហួសពីគុណតម្លៃនៃផលិតផលឬសេវាកម្មនោះដែរ។

៤– ‘ទេ‘ ចំពោះ​ការរើសអើង​៖ ក្នុងនាមជាមេដឹកនាំក្តី ជាអ្នក​ទីផ្សារ​ក្តីឬជាបុគ្គលិកធម្មតាក្តី។ អ្នកដាច់ខាតមិនត្រូវ​ធ្វើ​អ្វីឱ្យវា​ហួស​ដែន​កំណត់​របស់ខ្លួន​ពេកឡើយ។ អ្នកត្រូវដឹងថាគ្រប់អតិថិជនដែលដើរមករកអ្នកទាំងអស់គឺសុទ្ធតែមានតម្លៃ បើទោះបីសម្លៀកបំពាក់របស់ពួកគាត់មិនសូវសមរម្យ ឬក៏មើលទៅ​ដូចមិនទំនងក៏ដោយ កុំឱ្យសោះរឿងប្រើភាសារដែលធ្វើឱ្យប៉ះពាល់ដល់ពួកគាត់។ កុំរើសអើងព្រោះពួកគាត់មើលទៅមិនស្អាតបាតឬមិនសូវទំនង តែអ្នកត្រូវ​ទទួលយកពួកគាត់ដោយក្តីរីករាយ និងប្រកបដោយ​ក្រមសីលធម៌ខ្ពស់។

អត្ថបទ៖ បូ ទីន

ផ្នែកមួយនៃសៀវភៅ៖ ផ្តើមពីសូន្យ

បញ្ជាក់៖ រាល់ការ Copy យកអត្ថបទពី Business Record ទាំងអស់ សូមបងប្អូនត្រូវដាក់ប្រភពឱ្យផង។ អរគុណ ដែលបានសហការ

សូមជួយចែករំលែកអត្ថបទនេះ ដើម្បីចំនេះដឹង :

អានអត្ថបទ:

• ដំបូន្មានរបស់លោក Richard Branson សម្រាប់សហគ្រិនជំនាន់ក្រោយ

• ពេលអតិថិជនកំពុងខឹង តើអ្នកគួរធ្វើដូចម្តេច?

• ផ្លាស់ប្តូរសកម្មភាពដើម្បីបង្កើនភាពឈ្លាសវៃ

• តើនាយកប្រតិបត្តិ (CEO) ត្រូវមានកាតព្វកិច្ចសំខាន់ៗអ្វីខ្លះ?