៥រឿងដែលអ្នករកស៊ីថ្មីថ្មោងត្រូវតែមានជាដាច់ខាត
- 2022-07-22 6:16:09
- ចំនួនមតិ 0 | ចំនួនទស្សនា 513
៥រឿងដែលអ្នករកស៊ីថ្មីថ្មោងត្រូវតែមានជាដាច់ខាត
បង្កើតអាជីវកម្មលើកដំបូង វាមិនមែនជារឿងងាយស្រួលនោះទេ គឺវាទាមទារនូវការរៀបចំគម្រោងនានាទៅតាមដំណាក់ការនីមួយៗឱ្យបានច្បាស់លាស់។ ដើម្បីផ្តល់ជាតម្រុយខ្លះៗខាងក្រោមនេះគឺជាជំហានគោលសំខាន់ៗសម្រាប់ឱ្យបងប្អូនយកទៅគិតពិចារណាមុនចាប់ផ្តើមអាជីវកម្ម។
រឿងទី១: ផែនការអាជីវកម្ម (Business Plan)៖ អ្នកមិនអាចសង់ផ្ទះដោយមិនដឹងពីប្លង់ផ្ទះបានឡើយ ដូចគ្នានេះដែរការធ្វើអាជីវកម្មមួយក៏ត្រូវចាប់ផ្តើមពីផែនការអាជីវកម្មដែរ។ ការសរសេរផែនការអាជីវកម្មកើតឡើងពីការសិក្សាពីអាជីវកម្មដែលអ្នកចង់បើកឱ្យបានច្បាស់លាស់ ហើយត្រូវរៀបរាប់ពីទស្សនវិស័យ បេសកកម្ម លក្ខណៈផលិតផល និងសេវកម្ម ការចាត់ចែងហិរញ្ញវត្ថុ រចនាសម្ព័ន្ធគ្រប់គ្រង យុទ្ធសាស្ត្រទីផ្សារ និងផែនការផ្សេងៗសំខាន់ៗជាច្រើនទៀត។
រឿងទី២: ទីតាំងអាជីវកម្ម៖ ការជ្រើសរើសទីតាំងសម្រាប់បើកអាជីវកម្ម គឺជាជំហានសំខាន់មួយទៀតបន្ទាប់ពីផែនការអាជីវកម្ម។ គន្លឹះដ៏ល្អដើម្បីធ្វើឱ្យអាជីវកម្មរបស់អ្នកលេចឈ្មោះទៅដល់សាធារណជនទូទៅបាន គឺមានគម្រោង និងការស្រាវជ្រាវច្បាស់លាស់ជាមុនទៅលើទីតាំងភូមិសាស្ត្រ ស្ថានភាពប្រកួតប្រជែង រួមជាមួយនឹងការឈ្វេងយល់ពីនីតិវិធីច្បាប់ និងពន្ធដារនៅក្នុងតំបន់នោះផងដែរ។
រឿងទី៣: មានដើមទុនសម្រាប់បើកអាជីវកម្ម៖ ហិរញ្ញវត្ថុឬទុនសម្រាប់បើកអាជីវកម្មអាចមិនមែនជាបញ្ហានោះទេ ប្រសិនបើអ្នកមានប្រាក់គ្រប់គ្រាន់សម្រាប់បើកអាជីវកម្មរបស់ខ្លួន។ តែនៅមានច្រកផ្លូវជាច្រើនទៀតដែលអ្នកអាចបង្កើតអាជីវកម្មបាន បើទោះបីជាគ្មានប្រាក់គ្រប់គ្រាន់ក៏ដោយ ដូចជាខ្ចីប្រាក់ពីគ្រួសារឬមិត្តភក្ដិ ធនាគារ ឬអាចចូលហ៊ុនគ្នាក៏បាន។
រឿងទី៤: មានអាជ្ញាប័ណ្ណបើកអាជីវកម្ម៖ សម្រាប់ប្រទេសកម្ពុជា ការចុះអាជ្ញាប័ណ្ណអាចធ្វើឡើងនៅក្នុងក្រសួងពាណិជ្ជកម្ម។ ការសុំអាជ្ញាប័ណ្ណគឺជាផ្នែកមួយនៃការទទួលស្គាល់ និងផ្តល់អាជ្ញាប័ណ្ណដល់ក្រុមហ៊ុនរបស់អ្នកអាចដំណើរការអាជីវកម្មដោយស្របច្បាប់បាន។ ហើយនេះក៏អាចការពារហានិភ័យមួយចំនួនដូចជាការរំលោភកម្មសិទ្ធិបញ្ញា ព្រមទាំងចែងពីកាតព្វកិច្ច និងទំនួលខុសត្រូវនានាដែលអ្នកត្រូវបំពេញជាមុន ដូចជាលក្ខខណ្ឌការងារ បង់ពន្ធដារជូនរដ្ឋជាដើម។
រឿងទី៥: ទំនួលខុសត្រូវលើបុគ្គលិក៖ ការបំពេញបែបបទខាងលើគ្រាន់តែជាវិថីមួយបើកច្រកផ្លូវឱ្យអ្នករកស៊ីទាំងអស់អាចដំណើរការអាជីវកម្មបានត្រឹមត្រូវស្របតាមនីតិវិធីច្បាប់ប៉ុណ្ណោះ។ ប៉ុន្តែអ្វីដែលជាជំហានបន្ទាប់របស់អ្នកក្នុងនាមជាអ្នករកស៊ីឬប្រធានក្រុមហ៊ុន គឺត្រូវមានទំនួលខុសត្រូវលើស្ថានភាពទូទៅរបស់បុគ្គលិក។ ការបង់ពន្ធ ប្រាក់ខែ ប័ណ្ណធានារ៉ាប់រងសុខភាព និងអត្ថប្រយោជន៍ផ្សេងៗគឺសុទ្ធតែជាទំនួលខុសត្រូវដែលសហគ្រិនត្រូវធ្វើទាំងអស់។
អត្ថបទ៖ វិសាល
បញ្ជាក់៖ រាល់ការ Copy យកអត្ថបទពី Business Record ទាំងអស់ សូមបងប្អូនត្រូវដាក់ប្រភពឱ្យផង។ អរគុណ ដែលបានសហការ
សូមជួយចែករំលែកអត្ថបទនេះ ដើម្បីចំនេះដឹង :
អានអត្ថបទ:
© រក្សាសិទ្ធិគ្រប់យ៉ាងដោយ Business Record ឆ្នាំ ©2022
Business Recordនឺងនាំអាជីវកម្មរបស់លោកអ្នកទៅដល់ចំណុចកំពូលនៃភាពជោគជ័យ
Business Record មានចក្ខុវិស័យមួយដើម្បីជួយដល់ប្រជាជនកម្ពុជាឱ្យ យល់ដឹងបន្ថែមអំពីការធ្វើអាជីវកម្ម។ យើងផ្តល់ឱ្យពួកគេនូវដំណោះស្រាយ ទាំងឡាយណាដែលជួយ ឱ្យអាជីវកម្មរបស់ពួកគេមានកេរ្តិ៏ឈ្មោះ និងជាប្រភពនៃការលើកទឹកចិត្ត ដល់ប្រជាជនកម្ពុជាក្នុងការចាប់ផ្តើម ធ្វើអាជីវកម្មរបស់ពួកគេដែលប្រកបទៅដោយប្រសិទ្ធភាព។