គំនិតគួរពិចារណានៅពេលដែលអ្នកកំពុងជួបភាពតានតឹងនៅកន្លែងការងារ

  • 2019-11-16 9:10:00
  • ចំនួនមតិ 0 | ចំនួនទស្សនា 2204


នាយុគសម័យបច្ចុប្បន្ននេះ​​ បច្ចេកវិទ្យាកាន់តែជឿនលឿន មនុស្សម្នានៅលើពិភពលោកក៏កាន់តែមានភាពមមារញឹកកាន់តែខ្លាំងឡើងៗ​ពីមួយថ្ងៃទៅមួយថ្ងៃ​ ទាំងក្នុងការងារប្រចាំថ្ងៃ និង ការប្រកបរបរចិញ្ចឹមជីវិត។​ ដូច្នេះហើយវាជារឿងធម្មតាទៅហើយ ដែលមនុស្សម្នាក់ៗតែងតែជួបនឹងឧបសគ្គ និង វិបត្តិផ្សេងៗនៅក្នុងការងារប្រចាំថ្ងៃ ជាពិសេសនោះគឺបុគ្គលិកដែលកំពុងបម្រើការងារនៅតាមស្ថាប័ននានា។ ជាការពិតណាស់នៅពេលដែលបុគ្គលណាម្នាក់មានសមត្ថភាពកាន់តែខ្ពស់ កាន់តំណែងកាន់ធំ វាមិនមែនជារឿងងាយស្រួលនោះទេដែលពួកគេសុទ្ធតែអាចទ្រាំទ្រជាមួយនឹងបញ្ហាដែលតែងតែចូលមកដើម្បីឱ្យគេដោះស្រាយជារៀងរាល់ថ្ងៃ។​ ដូច្នេះហើយខាងក្រោមនេះគឺជាវិធីសាស្រ្តខ្លះៗដែលអាចប្រើប្រាស់ដើម្បីទប់ទល់​នឹងបញ្ហាក្នុងការងារ៖

១.​ បញ្ឃប់ការនិយាយថា ខ្ញុំស្អប់ការងារនេះ ឬ​ ខ្ញុំនឹងលាឈប់

ជារឿងងាយទេដែលអ្នកអាចនឹងប្រើប្រយោគនេះ ព្រោះសម្ពាធការងារប្រចាំថ្ងៃ វាបានធ្វើឱ្យអ្នកហ៊ាននិយាយ ឬ គិតពីប្រយោគមួយនេះដោយមិនញរញើត។ ប៉ុន្តែសម្រាប់មនុស្សឆ្លាតគេមិនជ្រើសប្រើវិធីនេះនោះទេ ព្រោះវាមិនត្រឹមតែមិនអាចជួយអ្វីដល់ពួកគេបាននោះទេ វាថែមទាំងបំផ្លាញនូវភាពជាម្ចាស់ការ​ និង ទំនុកចិត្តដែលមិត្តរួមការងារមានមកលើពួកគេ​​ថែមទៀតផង។ ហើយវាក៏ជាការបង្ហាញថាអ្នកជាមនុស្សគ្មានការអត់ធ្មត់នឹងការងារផងដែរ ប្រសិនបើអ្នកប្រើប្រយោគនេះនៅកន្លែងការងាររបស់អ្នកនៅពេលនេះ នោះអ្នកក៏អាចនឹងប្រើប្រយោគនេះនៅកន្លែងការងារបន្ទាប់របស់អ្នកបានដែរ។ គួរតែចេញពីកន្លែងចាស់ ក្រោយហេតុផលអភិវឌ្ឍន៍ខ្លួនជាជាងចេញពីកន្លែងចាស់ដើម្បីគេចពីបញ្ហា។

២.​ កុំប្រញាប់សម្រេចចិត្តរកការងារថ្មី ដោយសារតែអ្នកចង់គេចពីបញ្ហា

នៅពេលដែលអ្នកមានអារម្មណ៍ថា ចាប់ផ្ដើមមិនពេញចិត្តនូវអ្វីដែលខ្លួនកំពុងធ្វើ ប្រាកដណាស់ថាអ្នកនឹងបញ្ចេញសកម្មភាពចង់រើបម្រាស់ចេញពីកន្លែងដែលអ្នកមិនពេញចិត្តនោះ។ ឈប់ត្រង់នេះបន្តិច!!…. ចូរអ្នកចងចាំថាការសម្រេចចិត្តដ៏ត្រឹមត្រូវតែងតែកើតចេញពីការមានសតិ និង ការត្រិះរិះពិចារណាជាមុន។​ ម្យ៉ាងវិញទៀតបើអ្នកគេចពីបញ្ហានៅថ្ងៃនេះក៏មិនមែនមានន័យថាថ្ងៃស្អែក ឬ កន្លែងថ្មីដែលអ្នកនឹងទៅនោះ វានឹងគ្មានបញ្ហាដែរ។ ដូច្នេះចូរដោះស្រាយវានៅថ្ងៃនេះ នោះថ្ងៃស្អែករបស់អ្នកនឹងលែងជាបញ្ហាសម្រាប់អ្នកទៀតហើយ។

៣. ស្វែងរកមនុស្សម្នាក់ដែលអ្នកទុកចិត្ត

នៅពេលមួយដែលអ្នកយល់ថាទាល់ច្រក និង តានតឹងខ្លាំង តែអ្នកមិនអាចសម្តែងចេញមកបាន វាគឺជារឿងមួយដែលពិបាកទ្រាំណាស់មែនទេ? ប្រាកដណាស់វាច្បាស់ជាពិបាក ហើយរឹតតែពិបាកជាងនេះទៅទៀតនោះ ប្រសិនបើអ្នកគ្រប់គ្រងវាមិនបានល្អ នោះវានឹងបំផ្លាញអ្នក។ ទោះជាយ៉ាងណារាល់បញ្ហាវាតែងតែមានដំណោះស្រាយជានិច្ច ដោយអ្នកគ្រាន់តែរំងាប់អារម្មណ៍បន្តិច រួចគិតបន្តិចទៅមើលថាតើនរណាដែលអាចជួយអ្នកដោះស្រាយក្នុងរឿងនេះបាន​ ឬ ក៏នរណាដែលអ្នកយល់ថាគេអាចទទួលស្ដាប់រឿងរបស់អ្នកបាន។ ចូររកនរណាម្នាក់ដើម្បីចែករំលែករឿងក្នុងចិត្តរបស់អ្នកចុះ មិនថាជាបងប្អូន មិត្តភ័ក្តិ ឬ ជាឳពុកម្ដាយនោះទេ ចូរពិភាក្សាជាមួយពួកគេ ស្ដាប់នូវការណែនាំរបស់ពួកគេដែលអ្នកយល់ថាល្អជាជាងទុកវាតែក្នុងចិត្តម្នាក់ឯងរហូតធ្វើឱ្យវាមានឥទ្ធិពលមកបំផ្លាញអ្នកដោយមិនដឹងខ្លន។

 

អត្ថបទ៖ អែន ណា

បញ្ជាក់៖ រាល់ការ Copy យកអត្ថបទពី Business Record ទាំងអស់ សូមបងប្អូនត្រូវដាក់ប្រភពឱ្យផង។ អរគុណ ដែលបានសហការ

​សូមជួយចែករំលែកអត្ថបទនេះ​ដើម្បីចំនេះដឹង :



អានអត្ថបទ:


Develop by Botin POV | 096 649 72 88 | botin.pov@gmail.com